Idara ya Elimu Msingi

Idara ya Elimu Msingi Katika Halmashauri ya wilaya ya Igunga ni moja ya idara ambayo inatekeleza majukumu yake kwa kuzingatia Mtaala wa Elimu ya msingi na mtaala wa Elimu ya awali ambayo imeandaliwa kwa kuzingatia viwango vinavyokidhi haja ya kujifunza kwa ufanisi ili kumjengea mwanafunzi umahiri wa elimu ya awali na msingi kwa kuzingatia matakwa ya Sera ya Elimu na Mafunzo ya mwaka 2014. Sera hiyo inaelekeza kuwa elimu msingi ni ya lazima kwa kila mtoto wa Tanzania.

Sekta ya elimu na mafunzo, kwa mujibu wa Dira ya Maendeleo  ya Taifa ya 2025 na mpango wa muda mrefu wa maendeleo ya Taifa 2011/12 hadi 2014/25, inatarajiwa kuleta maendeleo ya haraka ya rasilimali watu kwa kutayarisha idadi ya kutosha ya Watanzania walioelimika na kupenda kujielimisha zaidi ili kulifanya Taifa lipate maendeleo na kuwa lenye uchumi wa kati na shindani ifikapo 2025.

Katika Wilaya ya Igunga huduma ya utoaji elimu ya Awali na  Msingi inafanyika kwa ushirikiano kati ya Halmashauri na wadau mbalimbali wa maendeleo waliopo katika Wilaya. Halmashauri ina jumla ya shule za Msingi 137 zilizosajiliwa, ambapo Shule 133 ziko chini ya umiliki wa serikali 1 zinamilikiwa na watu binafsi na 3 zinamilikiwa na taasisi za dini. Aidha usimamizi wa shule uko chini ya afisa Elimu Msingi katika ngazi ya Wilaya na Afisa Elimu Kata kwa ngazi ya kata.

Idara ya Elimu Msingi inaundwa na vitengo vitatu katika kutekeleza majukumu yake. Vitengo hivi ni kama ifuatavyo:-

• Elimu ya watu wazima
• Taaluma
• Takwimu
• Utamaduni na michezo

 MAJUKUMU YA IDARA YA ELIMU MSINGI 

1. Kupanga, kuratibu na kusimamia wajibu na maslahi ya watumishi katika Idara ya Elimu ndani ya Wilaya
2. Kupanua na kuimarisha Elimu ya,Awali, Msingi na Elimu ya watu wazima katika Wilaya
3. Kukagua na kufuatilia taarifa za ukaguzi wa Elimu ya Msingi na kutoa ushauri kwa walimu juu ya utekelezaji wa mitaala ya elimu
4. Kuandaa na kusimamia uendeshaji wa mitihani ya Elimu ya Msingi hasa darasa la IV na VII ya Taifa kila mwaka.
5. Kusimamia mgawo na mipango ya fedha kwa ajili ya uendeshaji masuala ya kielimu
6. Kuwaendeleza walimu kitaaluma ili watoe huduma bora zinazokidhi viwango
7. Kukusanya takwimu za watahiniwa wa darasa la IV na VII kutoka shuleni kuzihakiki na kuziwasilisha Mkoani kila mwaka
8. Kuagiza na kusambaza vifaa vya elimu katika shule, kugawa fedha na kusimamia matumizi ya fedha katika shule
9. Kubaini na kusimamia ikama ya walimu katika shule, kusimamia na kufuatilia miradi ya ujenzi wa madarasa, nyumba za walimu, vyoo na utengenezaji samani za shule
10. Kusimamia uanzishaji na uendeshaji wa maktaba za Kata na Vijiji
11. Kushirikiana na sekta za Afya, M/jamii na mashirika ya Umma kuendeleza Elimu Maalum kwa shule za Msingi
12. Kupanga, kuratibu na kusimamia michezo, kusimamia sera za michezo na utamaduni wa Kitanzania katika shule za msingi