Tarehe iliyowekwa: January 28th, 2025
WANANCHI Wilayani Igunga mkoani Tabora wametakiwa kujitokeza kwa wingi kwenye uzinduzi wa Samia Legal Aid Campaign kwa lengo la kupata msaada wa Huduma ya Kisheria unaotolewa na timu ya Watalaamu kutoka katika Kampeni hiyo.
Wito huo ameutoa leo Jumatatu Januari 27, 2025 Mkurugenzi Mtendaji wa Halmashauri hiyo, Bi. Selwa Abdalla Hamid wakati akiongea na Watalaamu wa timu hiyo katika Ofisi ya Mkurugenzi huyo mjini hapa.
Bi. Selwa alitoa wito kwa Wananchi wote ambao wanadaiwa kuwa na matatizo sugu wafike wapate msaada na kuacha tabia ya kusubiri viongozi wa kitaifa wanapokua na ziara wilayani hapa ndio wanajitokeza.
“Nitoe wito kwa wananchi wote kutokuwa na hofu ikiwa mnachangamoto zinazowagusa hata kama itakua ni viongozi msisite kutaja wapi mmekwamishwa kwa lengo la kupata msaada utakaoendelea kuwapa faraja,’’ alitoa wito.
Katika hatua nyingine, aliishukuru timu hiyo kwa kuweza kufika kwa sababu ni jambo la msingi hususan katika maeneo ya vijiji na kata ambako kunadaiwa kuwepo watu wengi ambao hawana taaluma ya sheria na huwenda wakawa na changamoto.
‘’Watanzania wanahaki sawa ya kupewa msaada, hivyo tunamshukuru Rais Dk. Samia Suluhu Hassan kwa kufikiria kuunda kampeni hii inayowagusa wananchi wenye changamoto,” alishukuru.
Aidha, aliihakikishia timu hiyo kuwa ofisi yake ipo tayari kuendelea kutoa ushirikiano hata kama ikitokea yale yanayosemwa yatawagusa katika utendaji wao wa kazi.
‘’Ni wajibu kuyatatua na kutoa msaada kwa sababu ndio kitu pekee kitakachowafanya Wananchi waendelee kuamini kuwa serikali inawajali,” alisema.
Timu ya Samia Legal Aid Campaign imeweka kambi ya siku tisa wilayani igunga ikilenga kuwafikia Wananchi katika vijiji na kata kuwasikiliza na kutatua changamoto ambazo zinawezakuibuka kuhusu msaada wa sheria.
==== //// ==== //// ===== //// ======
